గుండుసున్న

గుండుసున్న 

వానవచ్చి వాగులు పారె --- కోడివచ్చి గుడ్డుపెట్టె 

తాతవచ్చి తొంగిచూసే --- అవ్వవచ్చి గుడ్డు తీసే 

అమ్మవచ్చి అట్టువేసే ---- అట్టుచూసి గుటకలు వేశా

అన్నవచ్చి గుటుక్కున మింగే

నాకు మాత్రం గుండుసున్న 

జంతువుల అరుపులు

జంతువుల అరుపులు 

చెట్టు మీద కాకి ---- కావ్ కావ్

గోడమీద పిల్లి ----- మ్యావ్ మ్యావ్ 

మందలో గొర్రెపిల్ల ---- బే బే

తల్లినిచూసి మేకపిల్ల ---- మే మే

దొంగనుచూసి కుక్కపిల్ల ----- భౌ భౌ

ఇల్లెక్కిన కోడి --- కొక్కొరోకో

ఓ బొజ్జ గణపయ్య

ఓ బొజ్జ గణపయ్య 

ఓ బొజ్జ గణపయ్య --- నీ బంటు నేనయ్య 
కమ్మని పెరుగయ్య --- కందిపప్పయ్య 
పేరిన నెయ్యయ్య --- పెసరపప్పయ్య 
పార్వతి పరమేశ్వరుల ----తనయుడనీవయ్య 
ఎలుక వాహనం మీద ----- ఎక్కి రావయ్య 
ఉండ్రాళ్ళ మీదకు ---- దండు పంపయ్య

వానల్లు కురవాలి

వానల్లు కురవాలి

వానల్లు కురవాలి -- వానదేవుడా
వరిచేలు పండాలి --  వానదేవుడా
నల్లని మేఘాలు --  వానదేవుడా
చల్లగా కురవాలి --  వానదేవుడా

మాఊరి చెరువంతా --  వానదేవుడా
ముంచెత్తి పోవాలి --  వానదేవుడా
కప్పలకు పెండ్లిండ్లు --  వానదేవుడా
గొప్పగా చేస్తాము --  వానదేవుడా

పచ్చగా చేలంత --  వానదేవుడా
పంటల్లు పండాలి --  వానదేవుడా
వానల్లు కురవాలి -- వానదేవుడా
వరిచేలు పండాలి --  వానదేవుడా

ఏనుగు

ఏనుగు 

ఏనుగమ్మ ఏనుగు -- నాలుగుకాళ్ళ ఏనుగు 

ఏ ఊరొచ్చింది ఏనుగు ? -- మా ఊరొచ్చింది ఏనుగు 

ఏం చేసింది ఏనుగు ? -- మంచినీళ్ళు తాగింది ఏనుగు

ఏనుగు ఏనుగు నల్లన -- ఏనుగు కొమ్ములు తెల్లన

ఏనుగు మీద రాముడు -- ఎంతో చక్కని దేముడు

పిల్లి

పిల్లి

అల్లరిచేస్తే పిల్లొస్తుంది
ముక్కూ చెవులూ రక్కేస్తుంది
అల్లరిమానీ పిల్లల్లారా
చల్లగ మెల్లగ కూర్చోండర్రా
(పిల్లలు మారాంచేస్తే మానిపించటానికి ఇలాంటి పాటలే మాటలే చెబుతారు అమ్మలు)

చిలుక పలుకులు

చిలుక పలుకులు 

చిట్టి చిలకమ్మా -- పలుకు పలుకమ్మా 

ఆ గువ్వను చూడమ్మా -- గూడు కట్టమ్మా 

కోడీ పెట్టమ్మా -- గుడ్డూ పెట్టమ్మా 

పావురాయమ్మా -- పాపకీయమ్మా 

పాప చేతిలో ఉందమ్మా -- పంచదార చిలుకమ్మా

నా కాళ్ళ గజ్జెలు:--

నా కాళ్ళ గజ్జెలు:-- 

నా కాళ్ళ గజ్జెలు -- మోకాళ్ళ చిప్పలు

అబ్బబ్బ నడుము -- అద్దాల రవికె 

ముత్యాలహారం -- కస్తూరితిలకం

బిందె మీద బిందె -- బిందెలోన పెరుగు

పెరుగమ్మ పెరుగు -- తిరుగమ్మ తిరుగు

ఒప్పులుకుప్పా

ఒప్పులుకుప్పా

ఒప్పులకుప్పా -- వయారి భామా
సన్నా బియ్యం -- ఛాయ పప్పు
బావిలో కప్పా -- చేతిలో చిప్పా
రోట్లో తవుడు -- నీ మొగుడెవరు ???
గూట్లో రూపాయ్ -- నీ మొగుడు సిపాయ్.....

(ఆడపిల్లలు చిన్నప్పుడు ఎక్కువగా ఆడుకునే ఆటలలో ఇది ఒక ఆట. శివరాత్రి పండుగ వచ్చిన...... అట్లతద్ది వచ్చిన చేతికి గోరింటాకు పెట్టుకొని...... ఉయ్యాలలు ఊగుతూ...... చెమ్మచెక్క ఆటలు ఆడుతుంటారు..... కానీ ఈ రోజులలో ఆ ముచ్చట్లేమీ అస్సలు లేనే లేవు కదా)

మ్యావ్ మ్యావ్ పిల్లి

మ్యావ్ మ్యావ్ పిల్లి 

మ్యావ్ మ్యావ్ పిల్లి -- పాలకోసం వెళ్ళి 
వంటగదికి మళ్ళి -- తలుపు చాటుకెళ్ళీ 
మూతతీసి తాగ -- మూతి కాలె బాగా 
అమ్మవచ్చి చూచె -- నడ్డి విరగగొట్టె 


(పిల్లి ఎప్పుడూ దొంగతనంగా వంటింటిలోకి దూరిపోయి.... పాలు తగేస్తూ ఉంటుంది. అలా దొంగతనంగా పాలు తాగటం దాని సహజ గుణం. దాని కాళ్ళు , నడ్డి విరగగొట్టటం మన సహజ లక్షణం. కానీ ఈ రోజుల్లో పిల్లులకి అందకుండా పాలు-- పెరుగులు ఫ్రిజ్ లలోనే ఉంటున్నాయి.)

హాయమ్మ హాయీ ఆపదలు గాయీ:--

హాయమ్మ హాయీ ఆపదలు గాయీ:--

ఉళుళుళు హాయీ ఆపదలు గాయీ
చిన్నవాళ్ళను గాయీ శ్రీవెంకటేశా..ఉళుళుళు

చిలకల్లు చెలరేగి జీడి కొమ్మెక్కు
అబ్బాయి చెలరేగి మామ భుజమెక్కు
మామ భుజమెక్కి ఏమేమి అడుగు?
పాలు త్రాగు గిన్నడుగు పాడావునడుగు ..ఉళుళుళు

ఆడితే పాడితే అవ్వలకు ముద్దు
చప్పట్లు తట్టితే తాతలకు ముద్దు
చిట్టి ముత్యము పుట్టె సీత కడుపున
స్వాతి వానలు కురిసె సంద్రాల మధ్య..ఉళుళుళు

అందరి మామల్లు చందమామల్లు
అబ్బాయి మామల్లు రామలక్ష్మణులు
బూచివాడా రార బుట్టల్లుకోరా
బుట్టలో బాబును పట్టుకొని పోరా
నిద్రకు వెయ్యేండ్లు నీకు వెయ్యేంఢ్లు
నీతోటి బాలురకు నిండు వెయ్యేండ్లు..
ఉళుళుళు ఆయమ్మబాయమ్మ
అక్కచెల్లెళ్ళు తొలి ఒక్క జన్మాన తోడికోడళ్ళూ

జో అచ్యుతానంద జోజో ముకుందా:--

జో అచ్యుతానంద జోజో ముకుందా:--

జో అచ్యుతానంద జోజో ముకుందా
లాలి పరమానంద రామ గోవిందా..జో జో

తొలుత బ్రహ్మాండంబు తొట్టి గావించీ
నాలుగూ వేదాల గొలుసులమరించీ
బలువైన ఫణిరాజు పానుపమరించీ
చెలుల డోలికలలొన చేర్చి లాలించీ..జో జో

ముల్లోకములనేలు ముమ్మూర్తులారా
అడ్డాలలో నేడు బిడ్డలైనారా
ఏ జన్మలో నోములే నోచినానో
ఈ జన్మలో నాకు బిడ్డలైనారూ..జో జో

కాళ్ళాగజ్జ కంకాలమ్మ:--

కాళ్ళాగజ్జ కంకాలమ్మ:--

కాళ్ళాగజ్జ కంకాలమ్మ
వేగు చుక్కా వెలగామొగ్గా
మొగ్గా కాదూ మోదుగపువ్వు
పువ్వూ కాదు బావిలో నీరు 
నీరూ కాదూ నిమ్మల గడ్డ
గడ్డా కాదు చేలో వరీ
వారీ కాదూ వావింటాకు
ఆకూ కాదూ గుమ్మడి పండూ
పండూ కాదూ కాయా కాదూ
కాలూ తీసి గట్టు మీద పెట్టు.

నా పేరు జమిందారు

నా పేరు జమిందారు 

కాకీ కాకీ కడవల కాకీ 
కాకీ నాకు కడియాలిస్తే 
కడియం తెచ్చి అమ్మకు ఇస్తే 
అమ్మ నాకూ అటుకులు పెడితే 
అటుకులు తెచ్చి పంతులుకిస్తే
పంతులుగారు పాఠం చెబితే
మామా ముందూ పాఠం చదివితే
మామా నాకు పిల్లానిచ్చే
పిల్ల పేరు మల్లెమొగ్గ
నా పేరు జమిందారు... 

మా బావ వీరుడు

మా బావ వీరుడు 

మా బావ వీరుడు -- మంచం దిగడు
చీమంటే చాలు -- చిటికెలు వేస్తాడు 
తెలంటే చాలు -- చిందులేస్తాడు 
కాకంటె చాలు -- కర్ర తీస్తాడు 
ఎలుకంటే చాలు -- ఎగిరి పడతాడు
కుక్కంటే చాలు -- కిక్కురుమనడు
పిల్లి అంటే చాలు -- తుర్రుమని పారిపోతాడు

(బావలు ఉండేది ఎప్పుడూ డచ్చాలు కొట్టడానికే...... అదీ మరదళ్ళ దగ్గరే.... 
అసలు రంగు బయటపడితే ఇంతే సంగతులు)